Marrëveshja e lëvizjes së lirë është arritur më 2 Korrik 2011 në raundin e pestë të diskutimeve në në mes zëvëndës kryeministres së Kosovës znj. Edita Tahiri dhe ish zyrtarit të Ministrisë së Punëve të Jashtme, z. Borco Stefanovic. Kjo marrëveshje rregullon termet e lëvizjes së lirë të qytetarëve dhe automjeteve të të dyja palëve brenda dhe përmes territorit të njëra-tjetres. Termet e përdorura në këtë marrëveshje reflektojnë qëndrimin e palëve ndaj statutit të Kosovës, duke përdorur të dy termet njëkohësisht kufij dhe kufij administrativ. Më 14 shtator 2016, në Bruksel u ridiskutua kjo marrëveshje dhe u arritën aranzhimet lidhur me finalizimin e zbatimit të marrëveshjes për lëvizjen e lirë të vitit 2011.

Marrëveshja për regjistrat civil është arritur më 2 korrik të vitit 2011 në raundin e pestë të bisedimeve mes zëvëndës kryeministres së Kosovës znj. Edita Tahiri dhe ish zyrtarit të Ministrisë së Punëve të Jashtme, z. Borco Stefanovic. Sipas saj, një komitet trepalësh i kryesuar nga EULEX, do të formohej për të identifikuar zbrazëtirat në librat amzë origjinal të para vitit 1999 të cilat mungojnë. EULEX-i parashihej që të vërtetonte kopjet e librave amzë nga Kosova, komunë pas komune dhe do ti procesonte kopjet e vërtetura për të krijuar një regjistër plotësisht të besueshëm në Kosovë. Ministria e Dialogut në muajin Mars të vitit 2015 ka konstatuar se zbatimi i kësaj marrëveshje është përfunduar me sukses.

Në dhjetor të vitit 2011 palët negocuese kanë arritur një marrëveshje mbi konceptin e zhvilluar nga BE për menaxhimin e integruar të pikave të kalimit kufitar (IBM). Sipas kësaj marrëveshjeje palët kanë për qëllim të instalojnë gradualisht objekte të përbashkëta dhe të sigurta në të gjitha vendkalimet e tyre të përbashkëta të IMB-it, të cilat vendosen përbrenda një ‘zone të përbashkët të vendkalimeve të IBM-it’, ku zyrtarët e secilës palë do të kryejnë kontrollet përkatëse. Marrëveshja parasheh se palët nuk do të shfaqin simbolet e jurisdiksioneve të tyre përkatëse në zonat e përbashkëta të vendkalimeve të IBM-it.

Marrëveshja për njohjen reciproke të diplomave u arrit më 02 Korrik 2011, në raundin e pestë të bisedimeve të dialogut teknik në mes zëvëndëskryeministres së Kosovës znj. Edita Tahiri dhe ish zyrtarit të Ministrisë së Punëve të Jashtme, z. Borco Stefanovic me lehtësimin e përfaqësuesit të BE-së, z. Robert Cooper. Kjo marrëveshje u ridiskutua dhe një marrëveshje e re u arrit më 29 shtator 2015, e cila u rikonfirmua edhe një herë më 19 janar 2016. Kjo marrëveshje përfshinë të gjitha nivelet universitare (Bachellor, Master dhe Doktoratë), diplomat e shkollave të mesme, arsimin profesional, si dhe nivelin e pestë të kualifikimeve sipas kornizës evropiane të kualifikimeve.

Më 7 tetor 2013 marrëveshja për vizitat zyrtare reciproke ishte arritur parimisht mes ish kryeministrit të Serbisë Ivica Dacic dhe ish kryeministrit të Kosovës Hashim Thaçi, ndërsa u finalizua më 14 nëntor të vitit 2014, mes përfaqësueses së Kosovës znj. Edita Tahirit dhe përfaqësuesit të Serbisë z. Marko Djuric. Përmes kësaj marrëveshjeje palët u pajtuan që zyrtarët ndërlidhës përkatës të vendosur në Prishtinë dhe Beograd të merreshin me procedurat dhe detajet e vizitave. Në tekstin e marrëveshjes u përcaktuan zyrtarët të cilët duhet të bënin kërkesë për të realizuar vizitat si dhe modalietet e trajtimit të këtyre kërkësave. Kjo marrëveshje filloi të zbatohej më 1 dhjetor 2014.

Për herë të parë çështja e energjisë u diskutua në raundin e katërt të dialogut Kosovë-Serbi të mbajtur më 18 maj të vitit 2011. Edhe pse diskutimet vazhduan edhe në raundet e mëvonshme të dialogut, nuk pati marrëveshje mes palëve deri më 8 shtator të vitit 2013. Marrëveshja u arrit mes ish kryeministrit të Kosovës z. Hashim Thaçit dhe ish kryeministrit të Serbisë z. Ivica Daciçit.

Marrëveshja për revitalizimin e Urës së Mitrovicës dhe rrugës kryesore (rr.Mbreti Peter) u arrit me datën 25 gusht 2015 nga Kryeministri i Republikës së Kosovës z. Isa Mustafa dhe Kryeministri i Republikës së Serbisë z. Aleksandar Vucic. Palët u dakorduan që të bëhej rivitalizimi i Urës dhe hapësirës përreth në bazë të planit arkitekuror të dakorduar mes tyre më 29 Qershor 2015. Parashihej që ura të hapej për qarkullim si dhe komuna do të rivitalizonte rrugen kryesore (rruga Mbreti Peter) në zonë për kombësorë. Me këtë marrëveshje u përcaktua që do mbikqyrej në mënyrë të rregulltë aspekti politik dhe i sigurisë gjatë procesit të rivitalizimit të urës, si dhe do të përcaktohej periudha kur hartat e linjave administrative të zonave kadastrale në Suhodoll/Suvi Do dhe Kroi i Vitakut/Brdjani do të zgjidheshin përmes Memorandumit të Mirëkuptimit për Planet Zhvillimore Komunale, Hartës se Zonimit Komunal dhe Planit Rregullues të Detajuar nga ministritë relevante dhe dy komunat. Më 5 Gusht 2016, palët u ritakuan për shkak të moszbatimi të marrëveshjes dhe u dakorduan në marrëveshje të re e cila u emërtua si plani i BE-së për implementimin e marrëveshjes për Urën në Mitrovicë, e cila cilësoi Urën e Mitrovicës si simbolin e normalizimit të marrëdhëneive mes serbëve, shqiptarëve dhe komuniteteve të tjera të Kosovës duke lehtësuar kontaktet, shkëmbimet dhe mirëkuptimin midis qytetarëve në të dy anët e qytetit. Sipas kësaj marrëveshjeje u dakordua që leja e ndërtimit të fillonte me 14 gusht 2016, sipas së cilës ura e Mitrovicës do të hapet për këmbësorë dhe automjete në të dy drejtimet. Periudha kohore e përcaktuar me këtë marrëveshje për hapjen e Urës për qarkullin të plotë është 20 Janar 2017. Në të njëjtë periudhë kohore, pritet që Rruga e Mbretit Petar të rivitalizohet në zonë për këmbësorët nga komuna e Mitrovicës së Veriut.

Marrëveshja mbi Parimet e Përgjithshme të Asociacionit/Bashkësisë së komunave me shumicë serbe në Kosovë u arrit me datën 25 gusht të vitit 2015, mes Kryeministrit të Kosovës Isa Mustafa dhe Kryeministrit të Serbisë Aleksandar Vuçiç. Kjo marrëveshje derivon nga marrëveshja e Parë e Parimeve që Rregullojnë Normalizimin e Marrëdhënieve, e arritur më 19 prill të vitit 2013. Në 22 pikat e saj marrëveshja mbi Parimet e Përgjithshme përcakton detajet e formimit të Asociacionit/Bashkësisë së komunave serbe në Kosovë duke përfshirë, kornizën ligjore, objektivat, strukturën organizative, marrëdhëniet me autoritetet qendrore, kapacitetin ligjor si dhe çështjet buxhetore, si dhe për kontributet, grantet, donacionet si dhe përkrahja financiare e asociacioneve dhe organizatave tjera, vendore dhe ndërkombëtare, si edhe nga Republika e Serbisë. Marrëveshja parasheh gjithashtu që statuti i Asociacionit/Bashkësisë do të hartohet nga Ekipi Menaxhues dhe do të prezantohet në Dialogun e Nivelit të Lartë, brenda 4 muajve nga data e arritjes së kësaj marrëveshjeje. Për më tepër, ai do të konfirmohet me dekret, pas marrëveshjes në Dialog, ndërsa secili amendament do të prezantohet nga Asociacioni/Bashkësia, do të konfirmohet me dekret dhe do të shqyrtohet nga Gjykata Kushtetuese.

Marrëveshja e Parë për Normalizimin e Marrëdhënieve e cila u nënshkrua nga Kryeministri i atëhershëm i Kosovës z. Hashin Thaçi dhe Kryeministri i atëhershëm i Serbisë z. Ivica Daçiç me 19 Prill 2013. Plani i zbatimit të tij u dakordua midis palëve me vënien e inicialeve të tyre më 21 Maj 2013. Kjo marrëveshje trajton parimet e përgjithshme që trajtojnë formimin dhe kompetencat e asosacionit/bashkësisë së komunave me shumicë serbe, ku element i rëndësishëm i kësaj marrëveshje është denominimi i dyfishtë i termeve të përdorura. Kjo marrëveshja parasheh gjithashtu shpërbërjen e strukturave serbe të sigurisë ne veri, krijimin e një policie regjionale për katër komunat e veriut. Gjithashtu element tjetër që trajtohet në këtë marrëveshje është integrimi i gjykatave brenda sistemit të drejtësisë së Kosovës në pajtim me kornizën ligjore të Kosovës, ku në kuadër të gjykatës së apelit në Prishtinë do të krijohet një panel me shumicë Serbe për rastet e komunave Serbe të veriut. Përpos panelit më shumicë Serbe parashihet krijimi i një divizioni të Gjykatës së Apelit në Veri. Kjo marrëveshje përcakton gjithashtu krijimin e komunave ligjore në Kosovë, organizmin e zgjedhjeve komunale në veri në janar të vitit 2014, parimin e financimit transparent, intensifikimin e diskutimeve për Energjisë dhe Telekomit, si dhe dakordimin për mos bllokimin e njëra-tjetrës apo nga palët e treta për rrugëtimin drejt BE-së. Plani i zbatimit u dakordua nga palët me 21 maj 2013. Ai përmban hapa konkret dhe parimet e përgjithshme për të dyja palët, përkatësisht për komisionin zbatues për zbatimin e marrëveshjes së parimeve të 19 Prill 2013. Planin i zbatimit përmban 6 elemente kryesore përkatësisht: i) Përshtatja e kornizës ligjore; ii) Asosacioni/bashkësia; iii) Policia; iv) Drejtësia; v) Zgjedhjet lokale dhe vi) Provizione të përgjithshme.

Marrëveshje rreth sigurimit të automjeteve u arrit deri më 23 qershor të vitit 2015 në mes të përfaqësueses së Kosovës znj. Edita Tahirit dhe përfaqësuesit të Serbisë z. Marko Djuric në prezencën e dy kryeministrave. Megjithatë, kjo çështje ishte përfshirë në marrëveshjen për lirinë e lëvizjes e cila u arrit më 2 korrik të vitit 2011 ku zgjidhje kalimtare përcaktohej se secila palë do t’iu mundësojë qytetarëve të palës tjetër blerjen e polisave të sigurimit kufitar. Ndërsa, me ndihmën e BE-së palët do të vazhdonin të punonin për një marrëveshje komerciale për sigurim reciprok të automjeteve. Me 23 qershor të vitit 2015, u arrit një Memorandum i Mirëkuptimit për “Njohjen Reciproke të Sigurimit nga Auto përgjegjësia për Palët e Treta (TPL) dhe marrëveshje për procesimin dhe pagesën e kërkesave” ndërmjet Shoqatës së Sigurimeve të Serbisë (SHSS) dhe Byrosë Kosovare të Sigurimit (BKS) me lehtësimin e Këshillit të Byrove (KB) (përgjegjës për rregullimin e kartonit të gjelbërt ndërkombëtar).