Pyetja ka të bëjë me sistemin paralel që zhvillohet në Republikën e Kosovës, respektivisht për planprogramet mësimore, pra të drejtpërdrejta prej Serbisë. Desha të pyes ministrin, shpresoj që në seancën e ardhshme do të marr përgjigje nga ai, në lidhje me veprimet e tij konkrete dhe meqenëse nuk është këtu, dua të jap një sqarim të shkurtër. Sistemi paralel i arsimit në Kosovë sipas plan programeve mësimore zhvillohet në fshatrat e komunitetit goran kryesisht. Gjimnazi i këtij sistemi gjendet në fshatin Mlik, ndërsa selinë kryesore kjo strukturë paralele po e zhvillon në fshatin Branjo dhe pikërisht nga ky komunitet goran kemi pasur zëvendësministër, i cili ka qenë Ysmen Ballxhi, i cili është dashur që ta marrë këtë çështje seriozisht dhe se është dashur ta pranojë edhe Republikën e Kosovës si shtet të vetin dhe jo të zhvillojë sistem paralel, përndryshe edhe është dashur ta ushtrojë edhe ndikimin e vet. Prandaj, pres përgjigje prej tij. 

Pyetja ka të bëjë me atë se studentët, të cilët kanë fituar në konkursin për vendosjen në konvikte janë maltretuar disa ditë me vendosjen e tyre në objektet e banimit studentor. Nga keqmenaxhimi i vendosjes së studentëve nëpër konvikte ata kanë qenë të detyruar të flenë jashtë për të pritur rendin e tyre herët në mëngjes. Në fakt, unë doja ta pyesja ministrin a është në dijeni për këtë dhe se sot konvikti, pra, është marrë si çështje jobarazie e studentëve, ku studentët të cilët nuk kanë mundësi ekonomike banojnë nëpër konvikte, ndërsa do të duhej të ishte krejtësisht ndryshe, ku studentët, pra nëpër konvikte do të duhej ta kishin një jetë më të rregullt dhe se konvikti do të duhej të përfaqësonte këtë identitetin dhe dinjitetin studentor, dhe meqenëse po ndodhin këto për shkak të institucioneve, edhe dinjiteti i studentëve është nëpërkëmbur, sepse këto institucione po veprojnë kështu. Faleminderit!

Ministër, unë kam pyetur sa objekte të trashëgimisë kulturore dhe historike janë dëmtuar nga paslufta?
Së dyti, sa objekte prej tyre janë dëmtuar për të dytën herë dhe çfarë masash janë ndërmarrë, në fakt, nga ju dhe sigurisht ju kur e keni marrë ministrinë, e keni parë se çfarë masash janë
ndërmarrë edhe nga ministri.
 

Unë e pyeta ministrin Gashi për numrin, në fakt, nuk m’u përgjigj. E kam pyetur për numrin e objekteve të trashëgimisë kulturore në Prizren, saktësisht pra që nga paslufta sa kanë qenë të
dëmtuara, kjo ka qenë pyetja e parë. Pyetja e dytë ishte: sa prej atyre objekteve janë së dyti, së treti a së katërti herë të dëmtuara, pra të shkatërruara? Tash po e bëj sërish të njëjtën pyetje se nuk m’u përgjigj, ishte një përgjigje e përgjithshme dhe
ministri tha për këtë përgjegjëse janë institucionet gjegjëse.
Ministër, cilat janë ato institucione gjegjëse, sepse brenda asamblesë, thashë, kemi pasur një histori të përbashkët. Unë atëherë kam qenë kuvendar, ju keni qenë kryesues, edhe atëherë ju pata pyetur kush është institucioni përgjegjës për shkatërrimin e trashëgimisë kulturore...?
 

Kryeministër, unë e kam sjellë një peticion në zyrën tënde dhe atë peticion të njëjtë e kam dërguar edhe në AKP, në Hatmaxhë, një fshat në Prizren, janë privatizuar tokat bujqësore, ku
banorët i kanë punuar me dhjetëra vjet dhe si përfaqësues i tyre ata kanë nënshkruar një peticion gjithëpërfshirës me qytetarë të prekur nga kjo ose ky privatizim dhe nëse e keni parë dhe që po
besoj që e keni parë, sepse kam parë lajme nëpër mediume të ndryshme, ku ju megjithatë procesin e privatizimit e keni shtyrë edhe për një vit, edhe këtë kërkoj ta di, pra edhe nga ana
juaj. Ata kanë pasur disa kërkesa, po unë po e përmend një më kryesoren, që t’u njihet e drejta e parablerjes dhe ato toka të largohen nga ky privatizim. 
 

Kryeministër pyetja ime ka të bëj me 93 ish- punëtorët e KEDS-it, të cilët kanë pasur kontrata të përhershme, dhe atyre iu është ndërprerë kontrata e punës pa asnjëlloj shpjegimi në vitin 2016. Punëtorët e larguar të KEDS - it e kanë ngritur rastin në gjykatë, inspektoriatin e punës me vendim ekzekutiv ka dhënë vendim për kthimin e tyre në punë. Cka do të bëhet me fatin e këtyre punëtorëve, po të drejtohem ty kryeministër që të interferosh për të sjellur së paku drejtësi morale sepse është e drejta është në anën e atyre punëtorëve.

Pyetja ka të bëjë me 93 ish-punëtorë të KEDS-it, të cilët kanë pasur kontrata të përhershme dhe atyre u është ndërprerë kontrata e punës pa asnjë lloj shpjegimi në vitin 2016. Punëtorët e larguar të KEDS-it kanë ngritur rastin në gjykatë, Inspektorati i Punës, me vendim ekzekutiv ka dhënë vendim për kthimin e tyre në punë. Dhe, ajo çka neve na intereson është se çka do të bëhet me fatin e këtyre punëtorëve dhe në këtë rast kryeministri ka pritur këta 93 punëtorë në zyrën e tij, u ka premtuar që do të angazhohet së paku ta shtyjë çështjen e tyre përpara, sepse e drejta është në anën e punëtorëve. Këto korporata, edhe pse janë privatizuar, nuk duhet t’i mundojnë punëtorët qoftë me punë të ndryshme, sidomos me këtë çështjen e largimit, prandaj unë përgjigjen e pres në seancën e ardhshme. 

Unë po e përmend për ministrin çështjen, është fjala për rezervarin “Kalaja”, i cili është ndërtuar në vitin 1945, përgjatë kalasë, një trashëgimi historike. Të dy komorat e rezervarëve janë të lidhura për shkak të kapacitetit shumë të vogël të akumulimit prej 480 metra kub, rezervuari përdoret vetëm si strukturë për balancimin e rrjedhjes. Deri te rezervuari mund të arrihet vetëm në këmbë, gjë që ka vështirësuar rehabilitimin në vitin 2004. Në vitin 2004 janë zëvendësuar pajisjet përbrenda komorës së valvulës. Gjatë këtyre punëve është dëmtuar kontrolli i nivelit dhe uji ka hyrë në komoren e valvulës, gypat për kapërderdhje, derdhja e ujit të tepërt, nuk mund të funksionojnë pasi që gypi për kapërderdhje në komoren e djathtë është më e lartë se muri i rezervuarit dhe të dy komorat janë të lidhurat në mënyrë hidraulike. Zëvendësimi i pajisjeve është bërë në mënyrë joprofesionale, nuk janë gjetur as vizatime, e as skica për zëvendësimet, ndërrimet. Nuk janë instaluar gypat për ajrosje në pjesën e poshtme të valvulës hyrëse të vijës së gravitetit. Gypi kryesor që shkon lart nga stacioni i pompimit ka nevojë për një valvulë ajri me funksion të dyfishtë në pjesën e poshtme të valvulës hyrëse. Duket se rezervuari nuk e lëshon ujin. Rezervuari është tërësisht i mbuluar me dhe, por nuk është i rrethuar dhe, në fakt vizitorët e Kalasë i tërheq struktura, rekomandohet përreth rezervuarit të rrethohet një truall prej 400 metra katror. Zoti Lluka, a mund të na tregoni se a jeni në dijeni për këtë çështje dhe kur do të intervenoni për rregullimin e këtij problemi?

Pyetja ime ka të bëjë me një çështje të komunitetit rom, ashkali dhe egjiptian dhe, në këtë kontekst, unë dua të shpreh ngushëllime për ish-deputetin Kujtim Paqaku, i cili ka dhënë një jetë për arsimimin dhe emancipimin e komunitetit rom. Pyetja ime ka të bëjë me atë se a ka sesione të ndara në Burgun e Dubravës për komunitetin rom, ashkali dhe egjiptian dhe a ka kudo nëpër burgjet e Kosovës qeli ku diferencohet pra komuniteti rom, ashkali dhe egjiptian, sepse mbi bazën e informatave që kam unë, jo që ka, por të burgosurit e këtyre tri komuniteteve në njëfarë forme kërcënohen se do t’i çojnë në qeli të përbashkët, e nga aty edhe nuk mund të lëvizin dhe, nëse është kështu, këto qeli më nuk janë qeli burgu, por vërtet janë kampe përqendrimi!  Dhe se për herë e në vazhdimësi nga qytetarët e burgosur po na tregohen aty brenda dhe po thonë se ky komunitet aty rrihet, maltretohet, diferencohet, qoftë nga të burgosurit, por edhe nga punonjësit

Unë do ta ngre çështjen e deponisë së mbeturinave në Landovicë dhe, si fillim, do ta bëj një pyetje të shkurtër: A je në dijeni për këtë deponi dhe, së dyti, a e di shkaqet e problemeve të kësaj deponie deri te sjellja e sëmundjeve të ndryshme që po hasin qytetarët e fshatit Landovicë?

Ministre, në këtë fshat, në spitalin e Prizrenit janë të lajmëruara dhjetë raste për shkak të infeksionit dhe po ashtu tashmë edhe uji atje është i ndotur dhe shpeshherë qytetarët kanë problem edhe me ujin e pijshëm. Prandaj, unë publikisht të ftoj që së bashku me mua, në një ditë të zakonshme të vini atje dhe të shkojmë e t’i shikojmë hallet e qytetarëve atje. Së dyti, përmendet me shqetësim numrin e madh të deponive ilegale, mirëpo thatë që ka shqetësim edhe për deponitë legale. Pra, sa është numri i këtyre ilegale? Dhe sa shqetësuese janë këto deponi legale, po në epiqendër e pata Landovicën. Prandaj, edhe një herë po e përsëris, të ftoj që së bashku të shkojmë atje dhe ta shikojmë gjendjen e qytetarëve.

Z. Ministër, sipas ligjeve në fuqi të Republikës së Kosovës, ligjit të punës 03/L-212 dhe nenit 53 të Marrëveshjes së Përgjithshme Kolektive të Kosovës ku i punësuari me rastin e pensionimit gëzon të drejtën në pagesën përcjellëse në lartësi për tri(3) paga mujor bruto.
Në doganën e Kosovës veprohet në mënyrë selektive, dikush merr një (1) pagë të fundit është dikush tri (3). Pse ndodh ky selektim?

Z. Ministër, a jeni në dijeni që në skemën pensionale për qytetarët e Republikës padrejtësisht nuk njihet përvoja e punës për periudhën 1991-1999, atëherë kur shteti serb largonte punëtorët dhunshëm nga puna? Pse nuk u njihet përvoja e punës qytetarëve të larguar nga puna gjatë viteve 1991-1999?

Faleminderit, kryesues! Unë edhe para kësaj, në një interpelancë, e pata ngrehur çështjen e të riut 17-vjeçar nga Lugishta e Prizrenit, pra Selldin Alia, dhe kërkoj të di se a është në dijeni për këtë rast ministri, unë e di që është në dijeni, dhe se paraprakisht, pra ky i ri 17-vjeçar ka vdekur në vendin e punës. Po t’i shihte ministri fotografitë, ashtu siç i kam parë unë, sigurisht që do ta kishte shqetësim dhe se nuk do të mjaftohej me ato që ka thënë që Inspektorati ka shkuar në vendin e punës ku ka punuar ky djalosh në vitin 2015, sepse prej vitit 2015 kanë kaluar shumë vite. Dhe se sot ka deklaruar shifra, të cilat me gjasë nuk janë shumë reale. Ka thënë që tërësisht në krejt territorin e Republikës së Kosovës punojnë 52 fëmijë, pra e kam fjalën për punë të rënda, e prej këtyre 38 fëmijë, pra kërkojnë lëmoshë, 38 fëmijë ne i kemi në Prishtinë, 11 fëmijë punojnë në rrugë, 3 fëmijë në eksploatimin e pasurive natyrore, 11 fëmijë në rrugë pra kryesisht dalin duke mbledhur kënaçe, pastrojnë xhama, 3 fëmijë eksploatojnë pra pasuri të ndryshme, mbledhje të kërpudhave, të metaleve e tjera. Dhe, ministër, vetëm në gjashtë muajt e fundit kanë vdekur shtatë punëtorë, qoftë të rinj, apo edhe të vjetër. 

Ministër! Ju po flisni për fushata vetëdijësuese, e këtu po thoni siguria dhe shëndeti i punëtorëve mbi të gjitha, dhe unë po jua them që vetëm në gjashtë muajt e fundit i kemi shtatë punëtorë të vdekur. Për çfarë fushatash po flisni dhe po debatoni këtu? Për ato, të cilat marrin fonde e i harxhojnë kot së koti! Po thoni që punëtorët duhet t’i lajmërojnë organet kompetente, por a e dini që një punëtor i sektorit privat, pra po ta lajmërojë, ai më nuk do të jetë në vendin e punës. Për këtë juve ju nevojitet me njëfarë forme që ta ngrehni nivelin e përgjegjësisë në Inspektoratin e Punës, e kur thoni që në rastin e fundit pra të vdekjes së këtij djaloshi, Inspektorati e ka inspektuar këtë firmë në vitin 2015, ministër, në cilin vit jemi sot? 

zoti ministër, para disa javësh Komuna e Prizrenit, përkatësisht Drejtoria për Emergjencë dhe Siguri u është drejtuar juve me një kërkesë për shtim të numrit të punëtorëve të zjarrfikësve, mirëpo kërkesa është refuzuar dhe meqenëse kjo pyetje është bërë shumë më parë, sot rastësisht e patëm edhe një protestë të zjarrfikësve të cilët kërkonin më shumë të drejta, rritje të pagës, gjë që u përmend nga shumë kolegë deputetë këtu, e s’po dua ta përsëris. Mendoj që kërkesat e tyre janë legjitime dhe meqenëse i dini të gjitha specifikat, unë do të mundohem ta shkurtoj paksa. Ju e dini që më KFOR-i Gjerman po largohet dhe nuk është në Prizren, prandaj mbeten në përgjegjësinë e atyre 25 zjarrfikësve të Prizrenit, kur numri është shumë i vogël, përderisa në komunat në regjion, për shembull, Gjakova ka 55, Komuna e Prishtinës ka 155 zjarrfikës dhe se Komuna e Prizrenit dhe e Prishtinës nuk dallojnë shumë në numër. Prandaj, përveç asaj, në Prizren janë të rregulluar tashmë tre stacione të zjarrfikësve, është fjala për Zhur, Gjonaj dhe Reçan, të cilat janë të ndërtuara mirëpo ka mungesë të burimeve njerëzore. Prandaj, shpresoj në reflektimin tuaj dhe në përgjegjësinë që ta shtoni këtë numër në atë çfarë mund të përfundoj kërkesa. 

Me Ligjin e punës parashihet që mësimdhënësve, ministër, t’u paguhen edhe pagat jubilare. Meqenëse nuk ka kod në buxhet për këtë çështje, mësimdhënësit lëndët i fitojnë përmes gjykatave. Kjo është anomali që duhet rregulluar, duke vendosur një kod për këtë çështje në buxhet. Nga komuna nga vijë unë, pra komuna e Prizrenit, kemi qindra raste të mësimdhënësve, të cilët sorollaten gjykatave dhe kthinave të tyre dhe qindra të tjerë po presin një vendim për këtë kod buxhetor. Kryetari i Komunës sonë, jo që nuk do dhe nuk e ka parashikuar pagesën e tyre, por në mungesë të këtij kodi buxhetor e ka të pamundur pagesën dhe, ju si ministër, si do ta përmirësoni këtë anomali, në fakt a keni vullnet për ta bërë këtë? 

Ministri Rikallo nuk ka qenë një kohë shumë të gjatë këtu dhe unë dua ta bëj një pyetje për Ministrinë e Bujqësisë, në fakt, sepse në komunën e Prizrenit bujqit dhe blegtorët kanë pasur dëme në vlera prej mbi 177 mijë euro, dhe normalisht kjo ka ardhur si pasojë e vërshimeve dhe fatkeqësive natyrore. Ministria nga Komuna e Prizrenit e ka marrë një raport të dëmtimeve, gjegjësisht nga Drejtoria e Bujqësisë dhe unë kam pasur një takim me këta bujq dhe blegtorë, të cilët janë në pritje të kompensimit të dëmeve. Meqenëse nuk e di a ka dhe a ekziston kjo ministri, meqenëse nuk është as kryeministri këtu, unë në përgjithësi po ju drejtohem juve si koalicion i PAN-it e që ta keni parasysh këtë segment dhe kjo çështje, dëmi i bujqve nuk është vetëm në rastin e Prizrenit, sigurisht për krejt bujqit e Kosovës, e të cilët duhet t’i ndihmojë pra Qeveria, nëse ka jetë dhe për aq sa ka jetë. 

Në fshatin Karaçevë të Kamenicës, në rrugën që lidh fshatrat lokale hynë xhandarmëria serbe. KFOR-i dhe Policia e Kosovës kanë krijuar një rrugë alternative nga arat e këtyre fshatrave për të mos kaluar atë rrugë të cilën defakton e njohin Serbi. A jeni në dijeni lidhur me këtë çështje?

Kuvendi i Kosovës ka miratuar delemitimin e kufirit me Malin e Zi, duke i lënë jashtë 8200ha tokë.

Ju keni thënë se bashkë me Qeverinë Malazeze do të rishikoni këtë marrëveshje, duke pretenduar se do ti ktheni 8200ha tokë të falur. I nderuar Kryeministër, a keni filluar së paku të mendoni për këtë?