Pyetja ime ka të bëjë me parimin e orientimit profesional, i cili është një ndër parimet në të cilat mbështetet sistemi i ri arsimor kosovar, që ka të bëjë me zhvillimin dhe përdorimin efikas të aftësive, shprehive dhe sjelljeve të individit. Për aktivizimin e potencialeve intelektuale dhe fizike të njeriut është e nevojshme që ato të zbulohen dhe kultivohen që nga çerdhet e kopshtet e deri te orientimi shkollor, që nënkupton klasën e nëntë, po ashtu edhe arsimin profesional. Zoti ministër, pyetja është, a keni paraparë ndonjë projekt konkret rreth orientimit profesional?

Të nderuar ministra, Të nderuar kolegë deputetë, Pyetja ime ka të bëjë me edukimin e fëmijëve në sistemin parashkollor. Zoti ministër, edukimi i fëmijëve në mënyrë të institucionalizuar është një ndër faktorët kyçë për arritjen e cilësisë në arsim, prandaj konsideroj se kopshtet janë një ndër faktorët kyçë të edukimit të fëmijëve në periudhën parashkollore. Qasja në çerdhe dhe në shkollimin e hershëm vlerësohet me një rëndësi shumë të veçantë për dhënien e shanseve të barabarta fëmijëve. Ne në Prizren e kemi një situatë krejt ndryshe nga ajo që duhet të ishte. Ka disa herë që unë e kam shtruar këtë shqetësim, kam bërë edhe pyetje parlamentare, në Prizren edukimi parashkollor ndodhet në një gjendje të mjerueshme. Edhe pse Prizreni është qyteti i dytë për nga numri i banorëve, në Prizreni nuk e kemi asnjë kopsht publik. Në vitin 2017, unë kam kërkuar nga ministri Bajrami në projekt-buxhetin e vitit 2017 që të parashihet një kopsht publik për qytetin e Prizrenit dhe është ndarë buxheti prej 100 mijë eurove, duke pasur parasysh që pjesa tjetër do të jetë nga IPA fondi 2, dhe është bërë një memorandum nga Komuna e Prizrenit me Ministrinë e Arsimit, Shkencës dhe Teknologjisë. Pyetja ime është kjo: Zoti ministër, në këtë projektligj që janë ndarë 100 mijë euro, ne e dimë që këto mjete janë bartur për vitin 2018, çka po ndodh tani dhe çka do të ndodhë me memorandumin e nënshkruar në vitin 2018 ndërmjet Komunës

E nderuar zonja ministre, Çështja ime ka të bëjë me rrjetëzimin e gypave të ujit në rrugën “Janina” dhe rrugën “Nënë Tereza”, në Prizren. Për momentin, në këto dy rrugë, në rrugën “Janina” dhe rrugën “Nënë Tereza” në Prizren, ka shumë humbje fizike dhe komerciale, si dhe mundësi të interferimit të ndotësve biologjikë si shkak se në këto rrugë gypat e ujësjellësit janë instaluar para disa viteve dhe janë nga materiali PVC dhe ACC azbest çimento, që përmban elemente kancerogjene, dhe instalimi i gypit PVC në disa pjesë të linjës së ujësjellësit është bërë në të njëjtin kanal me atë të kanalizimit. Në Projektligjin për vitin 2018 kemi kërkuar zëvendësimin e tubave të PVC dhe ACC-së azbest çimento për shkak të vjetërsisë me tuba të rinj nga materiali PE. Pyetja ime është: Kur do të fillojë realizimi i këtij projekti zonja ministre, pra ndërrimi i gyp-sjellësit për rrugët “Janina” dhe “Nënë Tereza” në Prizren?

Është një çështje që është diskutuar disa herë në Kuvendin e Republikës së Kosovës, po që nuk është ndërmarrë, mendoj që nuk është ndërmarrë asgjë deri me tani. Kjo ka të bëjë me peshën e rëndë të çantave të shkollës që është një ndër shkaktarët kryesor dhe me të shpeshtë zoti ministër, të lakimeve të boshtit kurrizor të fëmijëve. Pasojat e një çante të rëndë që nga hulumtuesit në terren konsiderojnë që është 10 kilogram e sidomos për fëmijët që janë gjashtë dhe shtatë vjeç, ka pasoja të rënda të cilat nuk mund t’i vërejmë ndoshta tani, por ato pasoja do t’i përcjellin këta fëmijë gjatë gjithë jetës. Pra, do të kenë lakim të boshtit kurrizor. Zoti ministër, cilët janë hapat konkret që ju i keni ndërmarrë gjatë qeverisjes suaj me Ministrinë e Arsimit, për këtë problem që është shumë shqetësues për prindërit po edhe për mësimdhënësit dhe që ndikon drejtpërdrejt në shëndetin e fëmijëve?

I nderuar zoti ministër, siguria në vendin e punës po vazhdon të jetë shumë shqetësuese edhe pse kjo çështje rregullohet me dy ligje, me Ligjin e Punës dhe me Ligjin për Sigurinë dhe Shëndetin në Punë, mirëpo në Kosovë, në vendin tonë niveli i sigurisë në punë është shumë i ulët. Edhe këtë vit për dy muaj nga lëndimet kanë gjetur vdekjen disa persona në vendin e punës. Të drejtat e punëtorë dhe lëndimet, si dhe humbja e jetëve në vendin e punës po mbetet sfidë sidomos në sektorin privat. Jemi dëshmitarë të një numri të lartë të aksidenteve në vendin e punës dhe fundin tragjik të disa prej këtyre punëtorëve. Ne e kemi të ditur që pasojat janë si mungesë e pajisjeve të duhura nëpër vendet ku punojnë dhe e ushtrojnë aktivitetin e tyre në punë dhe shumë prej tyre janë edhe të diplomuar, por që nuk punojnë në vendet përkatëse ku atyre u takon. Siguria dhe mbrojtja në punë zoti ministër nuk është vetëm obligim ligjor, por kjo është nevojë thelbësore për përmasimin e produktivitetit dhe progresin ekonomik të vendit. Pyetja ime është: më intereson të di se cilët janë hapat konkret që ju i keni ndërmarrë si ministër dhe si ministri për sigurinë në punë dhe çfarë keni bërë për familjet e viktimave? Çfarë masash keni ndërmarrë si ministri ndaj atyre kompanive, të cilat nuk i kanë plotësuar kushtet? Faleminderit!