Përshëndetje i nderuar z. Kurteshi, pyetja ime është në lidhje me rritjen e pagave të bashkëpunëtorëve profesional në Këshillin Gjyqësorë dhe Prokurorial. Nga disa raporte që kam lexuar nga shoqëria civile, kam parë se keni ngritur zërin që bashkëpunëtorëve profesional të këtyre dy institucioneve t'iu rritet paga. Pyetja është kjo, çka ka ndodhur me rritjen e pagave për këta bashkëpunëtorë profesional, pasi që është diskutuar në Komisionin për Legjislacion që të ketë rritje pagash për këtë kategori, apo jo? Shpresoj të marr përgjigjen e pyetjes sime!
Ne si LVV dhe unë personalisht e kemi ngritur në çdo rast të mundshëm, në çdo diskutim nëpër institucione, çështjen e bashkëpunëtorëve profesionalë në sistemin gjyqësor dhe prokurorial të Republikës së Kosovës. Ne jemi të lumtur që kemi arritur që në ligjet e posamiratuara për gjykatat, KGJK-ën dhe KPK-ën, të pranohet pjesërisht propozimi i LVV për rritjen e numrit të bashkëpunëtorëve profesionalë për gjyqtarët dhe prokurorët. LVV dhe unë personalisht kemi kërkuar nga 2 bashkëpunëtorë profesionalë për çdo gjykatës dhe prokuror. Kuvendi ka miratuar nga një bashkëpunëtor profesional. Ky është një përmirësim i pjesërishëm, por relativisht pozitiv.
Sa i përket nivelit të pagave, LVV, respektivisht deputetja Albulena Haxhiu ka kërkuar koeficientin 5 për bashkëpunëtorët profesionalë në gjykata dhe prokurori. Fatkeqësisht, fatkeqësisht, në ligjin e pagave ky propozim i LVV nuk ka kaluar. Kuvendi ka miratuar një kofeficient 3.5 për bashkëpunëtorët profesionalë, që sipas mendimit tonë dhe timin, është një lëshim dhe gabim shumë i madh. Kjo nuk do të inkurajojë studentët-juristët e mirëfilltë të synojnë profesionin e bashkëpunëtorit profesional, sepse përgjegjësia, përgatitja dhe vëlllimi i punës nuk përputhen aspak me kompensimin dhe motivimin material, sidomos kur merret parasysh dallimi i madh në të ardhura midis gjykatësve dhe bashkëpunëtorëve profesionalë. Ju informojmë se vlera e koeficientit në Ligjin e posamiratuar në lexim të parë për pagat është 239 Euro. Pra, paga e bashkëpunëtorit profesional do të arrijë 836 Euro, që është dallim i madh me atë të prokurorit respektivisht gjykatësit.
Me nderime!
Pse nuk po zbatohet Ligji për ndalimin e pirjes së duhanit në vende të mbyllura (kafene, restorante, hotele). Ne që nuk e konsumojmë duhanin po kemi probleme të mëdha. Ju lutem të bëni presion tek Qeveria dhe inspektorët!
I nderuar, fillimisht dëshiroj t’iu përgëzoj për punën që keni bërë në lidhje me Projektligjin për paga. Me sa kam mundur të përciellë punën e këtij komisioni, të gjithë anëtarët kanë qenë shumë konstruktiv. Në draftligjin që ka kaluar në lexim të parë për policinë e Kosovës, shtesat kanë qenë deri në 50 %, ndërsa tani qenkan ulur në 40 %. Përse është bërë kjo ulje? Konsideroj që nuk është e drejtë sepse rrezikshmëria është shumë e lartë në ketë profesion! Shpresoj që do keni mirëkuptim dhe të ngritni këtë shqetësim.
I nderuar, a do të votoni Projektligjin për paga në seancën e datës 02.02.2019? Me respekt!
Ligji për pagat është ligj tepër i rëndësishëm. Mënyra e shenzimit të rreth 30% e buxhetit të shtetit, që shkon për paga për mbi 80 mijë të punësuar në sektorin publik, duhet të rregullohet me këtë ligj.
Ligji duhet të përcaktojë strukturën e pagave në sektorin publik duke u bazuar në parimin "pagë të njëjtë për punë të njëjtë". Ligji duhet të sigurojë se struktura e pagave siguron barazinë në paga në mes të kategorive të ndryshëm të të punësuarve në sektorin publik, sigurisht duke marrë parasysh dallimet në nivelin arsimor, pastaj dallimin në nivelin e përgjegjësisë, vështirësitë në punë, rrezikshmërinë në punë dhe cështje të tjera me rëndësi në përcaktimi e pagave.
Momentalisht, dallimet në paga në sektorin publik janë të mëdha. Draft-ligji aktual nuk duket se do të zvogëlojë këto dallime. Me rëndësi është që të gjitha kategoritë e të punësuarve në sektorin publik të jenë të përfshirë në diskutimet për përgatitjen e këtij ligji. Ky lloj diskutimi ka mungur. Pa u kryer ky diskutim dhe pa u pajtuar të gjithë të punësuarit për këtë ligj nuk besoj se është mirë që ky ligj të trajtohet në Kuvend.
Përshendetje i nderuar, pyetje ime është se a e dini se çka po ndodhë në Kolegje-Universitete private me procesin arsimor apo me thënë më ndyshe fabrika e prodhimit të diplomave, ku nuk është fare me rëndësi a mëson ose jo. Me rëndësi është që ti ta paguash vitin dhe nuk ka rëndësi akalon në provime ose jo gjithsesi do të diplomohesh. Ku si i diplomuar me bachelor apo master, do hysh në punë si edukator/e, mësues/e në ndonjë pozitë udhëheqëse në ndonjë institucion publik. E gjithë kjo ka një pasqyrë që çdo gjë ka ngecuar me fajin se në këto institucione private e që edhe unë kam qenë pjesë e AAB-së, te tillë stutent studiojnë e të tillë diplomojnë.
Përshëndetje z.Veseli, kam një pyetje për ju në lidhje me kushtet e punës së punëtorëve në sektorin privat. A do të ndërrmarrë Kuvendi ndonjë nismë për mbikëqyrje të zbatimit të Ligjit të Punës në sektorin privat gjegjësisht në respektimin e orarit të punës dhe diskriminimin që po u bëhet punëtorëve në sektorin privat?
E nderuara znj. Balaj-Halimaj, a mund të na informoni se përse për vitin 2019 nuk janë ngritur pagat për sektorin publik. Nuk e kam fjalën për ngritjen që parashihet me Ligjin për Pagat, por rritjen e cila ka ndodhë rëndom në vitet e fundit (paralelisht me ngritjen buxhetore). Ju falenderoj paraprakisht për mundin tuaj për t’u përgjigjur në këtë pyetje. Me respekt!
Pagat për vitin 2019 nuk janë rritur në të gjitha kategoritë për faktin që Kosova përfundimisht po e zgjidh këtë çështje, e cila për 20 vite pas luftës nuk ka arritur të zgjidhet. Prandaj kemi pasë kaos, dikujt i është ngritur paga dhe dikujt i është zvogluar. Rritja e pagava kur ligji të jetë në fuqi do të bëhet në bazë të rritjes ekonomike në vend.
Përshëndetje i nderuar, desha t'iu pyes se pse ne veteranët që punojmë domethënë në sektorin privat nuk gëzojmë asnjë benificion dhe as pensione?
I nderuar, sipas Ligjit për Ndryshimin dhe Pltësimin e Ligjit Nr.04/L-261 Për Veteranët e Luftës së UÇK-së Nenit 16. Pika 4. Të drejtën në përfitim financiar e ka vetëm Veterani Luftëtar i UÇK-së, i cili plotëson kushtet e përcaktuara me këtë ligj.Kjo dispozit nuk ka lidhje me vendin e punës publik apo privat. Nese jeni Veteran Luftëtar ju gëzoni të drejtën në pension dhe benificione të tjera sipas ligjit.
Me respekt,
Bekim Haxhiu
E nderuar deputete znj.Xhevahire Izmaku, kam dy pyetje për ju. E para, pse ne veteranët e punësuar nuk gëzojmë asnjë benificion nga Shteti? Dhe pyetja e dytë, çfarë mendoni për Dialogun Kosovë-Serbi, ku e shpie ky dialog Luginën e Preshevës?
Përshëndetje!
Përgjigjen e pyetjes së parë po besoj edhe vet e dini që për fajin e "dikujt" ende zyrtarisht të panjohur, u degradua statusi i veteranëve dhe unë besoj që pasi të pastrohen këto lista dhe shpresojmë të ndodh këtë vit, ju do të keni privilegjet e merituara me Ligj si në çdo vend bote që shteti i bën për veteranin e luftës!
Sa i përket pyetjes së dytë, mendoj personalisht se Lugina shpejt do të ndjejë dorën e shtetit si bashkëkombas! Meqënëse jemi në proces ende, në këtë drejtim tani s'mund të jap detaje më shumë! Me respekt!
E nderuara deputete, sa është paraparë të jenë shtesat për rrezikshmëri për Policinë e Kosovës në kuadër të Projektligjit për Pagat? Shpresoj që të keni në konsideratë gjendjen financiare aktuale e cila është shumë e pafavorshme për Policinë e Kosovës.
Shtesa e posaqme do të jetë edhe në ligjin e ri, duke mos tejkaluar 40% të pagës bazë. Kjo listë e zyrtarëve policore bashkë me shumën e mjeteve do të përcaktohet me akte tjera me.propozim të ministrisë përkatëse dhe të financave pas hyrjes në fuqi të ligjit te ri. Policia ka një ngritje kualitative të pagës në ligiin e ri që pritet të votohet këtë javë.
Përshëndetje e nderuar deputete zonja Shqipe Pantina, fillimisht vlerësoj lartë punën tuaj që jeni duke bërë në Kuvendin e Republikës së Kosovës, punë e cila ka bërë të ndryshoj shumë praktika jo të mira të Kuvendit. Në saje të kësaj unë kërkoj nga ju që këto ditë që është aktuale Projektligji për Paga të keni parasysh dhe të mos i lëni anash nenet dhe pikat që rregullojnë koficientin, rrezikshmërinë dhe shtesat e punës në Policinë e Kosovës. Kjo pasi që në Polici për momentin asnjë organ - sindikat nuk është duke lobuar apo artikuluar kërkesat e policëve e në veçanti njësive të specializuara ku ne të veprojnë. Njësi kjo që e kanë rrezikun ekstrem siç është njësia për trajtim të eksplozive që çdo moment rrezikon jetën personale gjatë kryerjes së detyrës, andaj e vetmja shpresë është tek autoriteti dhe niveli juaj që mund t’i merrni parasysh kushtet e policëve.
I nderuar zotëri Salihunga
Faleminderit për pyetjen dhe për vlerësimin tuaj. Sa i përket pyetjes suaj për ligjin për pagat, kërkesat që ju i keni parashtruar tashmë janë shqyrtuar më shumë kujdes nga komisioni për administratë publike në projektligjin për pagat dhe shumica prej tyre janë marrë parasysh dhe janë përfshi në draftin final të ligjit i cili pritet të miratohet së shpejti në Kuvend. Policia e Kosovës do të ketë një trajtim dinjitoz ashtu siq e meriton edhe në ligjin për zyrtarët publik edhe në ligjin për pagat.
Suksese në punën tuaj!
Përshëndetje i nderuar deputet z.Daut Haradinaj, kam respekt për ju dhe familjen e tuaj por desha ta bëj një pyetje. Për prindërit e familjeve të dëshmorve për të cilëve ju ka ndal pensioni i pleqërisë në Kosovë dhe që dy vite ata nuk i gëzojnë këto pensione gjë e cila mendoj që është shumë e padrejtë. Arsyetimi i tyre ka qenë që vetëm një pension është i lejuar që të mirret, ose ai i pleqërisë ose e familjes së dëshmorit. A ka ndonjë ndryshim kur votohet buxheti këtë muaj për këto familje të rëndësishme që kanë dhënë për Kosovën?
Përshëndetje z. Albin Kurti, Unë jam Blerim Ahmeti nga Presheva. Desha të të parashtroj një pyetje sa i përket ndyshimit të kufijve. Sipas deklaratave tuaja dhe LVV-së jeni kundër ndryshimit të kufijve. Biles edhe keni thirrur protesta nëse tentohet ndryshim kufijsh. Unë dhe gjithë qytetarët e luginës së Preshevës jemi për bashkangjitje me Kosovën, duke marrë parasysh neglizhimin total nga Beogradi dhe ngulfatjen e vazhdueshme nga autoritetet serbe. Desha të të rikujtojë që jemi mbi 100 mijë shqiptarë në këto treva. Çfarë kuptoni ju me ndryshim kufijsh ? A jeni për ndërrim territoreve (Preshevë, Bujanovc, Medvegjë) kundrejt (Leposaviq,Zubinpotok) Po ose Jo dhe Pse? A jeni për me e marrë luginën e Preshevës pa i dhënë asgjë Serbisë siç e pohon z. Thaqi.
Lëvizja VETËVENDOSJE! e përkrah popullin shqiptar që jeton në trojet e veta në komunat Preshevë, Medvegjë dhe Bujanoc (PMB), në realizimin e të drejtave të tyre qytetare, njerëzore dhe kombëtare. Shqiptarët aty janë autoktonë por të shtypur e të shfrytëzuar, të diskriminuar dhe të nënpërfaqësuar. Ata kontribuan në çlirimin e pavarësimin edhe të Shqipërisë edhe të Kosovës por mbetën jashtë të dyjave duke paguar kësisoj çmim shumë të lartë. Ne besojmë se nuk bën të flitet për PMB (siç bën presidenti i Kosovës ta zëmë) pa i përmendur katër gjëra: 1) autoktonësinë e shqiptarëve; 2) shtypjen e shfrytëzimin e tyre nga Serbia; 3) referendumin e 1 e 2 marsit 1992; dhe, 4) luftën çlirimtare të UÇPMB-së.
Ne jemi kundër ndarjes së Kosovës dhe ndarjes së Luginës së Preshevës ku do të copëtohej Kosova Lindore. Ne mendojmë se veriu i Kosovës i takon Kosovës, rreth 110 shtete na kanë njohur në këta kufij, dhe se tri komunat në Luginë të Preshevës janë komuna me shumice shqiptare, me ç'rast nuk mund të trajtohen vetëm disa pjesë të tyre, vetëm disa fshatra, apo vetëm një komunë e të tjerat jo, apo vetëm në këtë anë të aksit rrugor e hekurudhor e jo përtej.
Ngjashëm siç pat bërë para 5 a 6 vjetëve me çështjen e lapidarit të UÇPMB-së, Presidenti Thaçi po manipulon sërish me çështjen e Luginës së Preshevës, me ndjenjën kombëtare të shqiptarëve atje vetëm sa për të joshur interesim për idenë e shkëmbimit të territoreve. Ai gjatë një fjalimi që kishte me 30 nëntor në Atlantic Council në Ëashington D.C., për 55 minuta nuk e tha asnjë fjalë për Preshevën, Medvegjën e Bujanovcin. Kur është këtu në Kosovë ua premton bashkimin dhe i mashtron shqiptarët, deklarativisht flet, mirëpo, nuk merr vendim. Siç ka thënë deputeti Liburn Aliu, nëse Presheva, Medvegja e Bujanovci, dhe presidenti Thaçi pajtohen që Lugina t’i bashkohet Kosovës, atëherë pse dy palë që pajtohen, që merren vesh, nuk bëjnë marrëveshje me shkrim dhe nënshkrim?
Ne po ashtu mbështesim qëndrimin që në përbërje të delegacionit të ardhshëm e të vërtetë të Kosovës të ketë edhe përfaqësues të qytetarëve të Luginës së Preshevës, që bisedimet të bëhen mbi baza të reciprocitetit dhe ku shtrohet çështja e të drejtave të shqiptarëve të Preshevës, Bujanocit dhe Medvegjës, duke pas parasysh Deklaratën e vitit 2006 të përfaqësuesve Kuvendeve Komunale të të tre komunave si dhe referendumin e vitit 1992
Me pak fjalë është ky shqetësimi im, arsyeja e paraqitjes së kësaj pyetje ka të bëj me Ligji Nr. 06/L- 032 për Kontabilitet, Raportim Financiar dhe Auditim. Sipas këtij ligji dhe nenit 29, ka shkelje të të drejtave të studentëve që përfundojnë studimet në nivelin 2-të dhe të 3 - të të studimeve përkatësisht në Financa dhe Kontabilitet pasi ky ligj nuk ju njeh të drejtën që të licensohen si kontabilist e as si auditor dhe pse ata kryejnë hulumtime shkencore për Kontabilitet dhe Auditim. Për shkak se me këtë ligj ju kërkohet të gjithë të diplomuarve në Financa të marrin çertifikata pranë Shoqatave të Kontabilitetit. Pse po bëhet shkelja e të drejtave të studentëve?
Me pak fjalë është ky shqetësimi im, arsyeja e paraqitjes së kësaj pyetje ka të bëj me Ligji Nr. 06/L- 032 për Kontabilitet, Raportim Financiar dhe Auditim. Sipas këtij ligji dhe nenit 29, ka shkelje të të drejtave të studentëve që përfundojnë studimet në nivelin 2-të dhe të 3 - të të studimeve përkatësisht në Financa dhe Kontabilitet pasi ky ligj nuk ju njeh të drejtën që të licensohen si kontabilist e as si auditor dhe pse ata kryejnë hulumtime shkencore për Kontabilitet dhe Auditim. Për shkak se me këtë ligj ju kërkohet të gjithë të diplomuarve në Financa të marrin çertifikata pranë Shoqatave të Kontabilitetit. Pse po bëhet shkelja e të drejtave të studentëve?
